మల్టీప్లెక్స్ దోపిడీకి మరో రూపం..!
ప్రసాద్ ఐమాక్స్లో పార్కింగ్ – బ్యాగ్ లాకర్ పేరిట బలవంతపు వసూళ్లు**
🐍 కోబ్రా న్యూస్ ఎక్స్క్లూజివ్
హైదరాబాద్లో మల్టీప్లెక్స్ థియేటర్ల దోపిడీపై ఇప్పటికే తీవ్ర అసంతృప్తి వ్యక్తమవుతోంది. పెరిగిన టికెట్ రేట్లు, వందల్లోకి చేరిన పాప్కార్న్–కూల్డ్రింక్ ధరలతో ఒక సాధారణ మిడిల్ క్లాస్ కుటుంబం సరదాగా సినిమా చూడాలంటే వెయ్యి నుంచి రెండు వేల రూపాయలు ఖర్చు చేయాల్సిన పరిస్థితి నెలకొంది.
టికెట్ రేట్లు తగ్గించేందుకు తాము సిద్ధంగా ఉన్నామని, కానీ మల్టీప్లెక్స్ యాజమాన్యాలు ఒప్పుకోవడం లేదని నిర్మాతలే బహిరంగంగా చెబుతున్నారు. ఫుడ్ రేట్లపై కూడా మల్టీప్లెక్స్లదే పూర్తి ఆధిపత్యమని నిర్మాతల వాదన. ఈ నేపథ్యంలో మల్టీప్లెక్స్లపై నెగిటివిటీ పెరుగుతున్న వేళ, హైదరాబాద్లోని ప్రముఖ థియేటర్ Prasads IMAX లో మరో రెండు సరికొత్త దోపిడీ మార్గాలు తెరపైకి వచ్చాయి.
🚗 పార్కింగ్ ఫీజుల పేరిట బలవంతపు వసూళ్లు
ప్రసాద్ ఐమాక్స్లో పార్కింగ్ లోపల ఖాళీ ఉన్నా, ముఖ్యంగా శుక్రవారాలు, కొత్త సినిమా విడుదల సమయంలో “పార్కింగ్ ఫుల్” అంటూ అబద్దాలు చెబుతున్నారని ప్రేక్షకులు ఆరోపిస్తున్నారు. ఫలితంగా బయట వెహికల్ పార్కింగ్ ఏర్పాటు చేసి పార్కింగ్ ఫీజులు వసూలు చేస్తున్నారు.
మల్టీప్లెక్స్లో సినిమా చూస్తే పార్కింగ్ ఫీజులు వసూలు చేయరాదని కోర్టు ఉత్తర్వులు ఉన్నప్పటికీ, వాటిని పూర్తిగా పక్కనపెట్టి సినిమా చూసేందుకు వచ్చిన జనాల నుంచే బలవంతంగా డబ్బులు తీసుకుంటున్నారనే విమర్శలు వెల్లువెత్తుతున్నాయి.
ఇంకా ఆశ్చర్యకరమైన విషయం ఏమిటంటే – పార్కింగ్ ఫీజు కట్టినప్పటికీ “వాహనాల బాధ్యత మాది కాదు” అంటూ బోర్డులు పెట్టడం.
ప్రశ్నించడానికి, ఫిర్యాదు చేయడానికి అక్కడ మేనేజ్మెంట్ లేదా సూపర్వైజర్లు కనిపించకపోవడం, కేవలం హిందీ మాత్రమే మాట్లాడే సెక్యూరిటీ సిబ్బందిని పెట్టి తప్పించుకుంటున్నారన్న ఆరోపణలు వినిపిస్తున్నాయి.
🎒 బ్యాగ్ లాకర్ పేరిట కొత్త దోపిడీ
ఇది అయితే మరింత షాకింగ్.
ఆఫీస్లు, కాలేజీల నుంచి నేరుగా మాల్కి వచ్చే వారు ల్యాప్టాప్ బ్యాగులు, కాలేజీ బ్యాగులు తీసుకువస్తారు. సాధారణంగా మల్టీప్లెక్స్లలో బ్యాగ్ చెకింగ్ చేసి లోపలికి అనుమతిస్తారు.
కానీ ఇప్పుడు ప్రసాద్ ఐమాక్స్లో బ్యాగ్లను లోపలికి అనుమతించకుండా, “డిజి లాకర్” పేరిట బయట లాకర్లు ఏర్పాటు చేసి గంటకు ₹10 చొప్పున వసూలు చేస్తున్నారు.
మూడు గంటల సినిమా అంటే కనీసం ₹30 అదనంగా ఖర్చు చేయాల్సిందే.
ఇతర మల్టీప్లెక్స్లు, ముఖ్యంగా PVR వంటి థియేటర్లు బ్యాగ్లను లోపలికి అనుమతించకపోయినా ఫ్రీగా సెక్యూరిటీ సదుపాయం కల్పిస్తున్నాయి. మరికొన్ని థియేటర్లు చెకింగ్ చేసి పంపిస్తున్నాయి. కానీ ప్రసాద్ ఐమాక్స్లో మాత్రం లాకర్ పేరిట డబ్బులు వసూలు చేయడం తీవ్ర విమర్శలకు దారి తీస్తోంది.
😡 “సరదాగా సినిమా చూడటానికే శిక్షలా?”
వీకెండ్లో కొద్దిసేపు రిలాక్స్ అవుదాం, సినిమా చూద్దాం అనుకునే సామాన్య ప్రేక్షకుడిపై ఇలా ప్రతి దశలో అదనపు భారం మోపడం ఏంటని ప్రజలు ప్రశ్నిస్తున్నారు.
హైదరాబాద్లో కొత్త సినిమా చూడాలంటే తప్పనిసరిగా ప్రసాద్ ఐమాక్స్కే రావాల్సిందే అన్న స్థాయిలో క్రేజ్ ఉండటాన్ని క్యాష్ చేసుకుంటూ, యాజమాన్యం దోపిడీకి పాల్పడుతోందని విమర్శలు గుప్పుమంటున్నాయి.
కోబ్రా న్యూస్ ప్రశ్న
కోర్టు ఉత్తర్వులు ఉన్నా పార్కింగ్ ఫీజులు ఎందుకు?
బ్యాగ్ సెక్యూరిటీని ఉచితంగా ఇవ్వలేరా?
ప్రేక్షకుడిని ATMలా చూడడం సరైనదేనా?
సంబంధిత అధికారులు, వినియోగదారుల సంఘాలు ఈ వ్యవహారంపై స్పందిస్తాయా?
లేదా మల్టీప్లెక్స్ల దోపిడీకి సామాన్యుడు ఇంకా మూల్యం చెల్లించాల్సిందేనా?
ఇది కోబ్రా న్యూస్ ఎక్స్క్లూజివ్ రిపోర్ట్.
