సైబర్ నేరగాళ్లు ఏకంగా పోలీస్ వ్యవస్థ ను అడ్డుగా పెట్టుకొని నకిలీ పోలీస్ లు నిజమైన పోలీసుల్లా నటిస్తూ డిజిటల్ అరెస్ట్ కు పాల్పడుతున్నారు…సైబర్ నేరగాళ్లు ఇప్పటివరకు గుర్తు తెలియని లింక్ లు పంపి మోసం చెయ్యడం ఫేక్ బ్యాంక్ కాల్స్, లాటరీ కాల్స్, ఫేక్ ఫేస్ బుక్ ఐడీల ద్వారా మోసం చేసిన కేటుగాళ్లు ఇప్పుడు కొత్తగా డిజిటల్ అరెస్ట్ స్కామ్ తో ప్రజలని భయ బ్రాంతులకు గురిచేస్తున్నారు…పోలీస్ అధికారుల్లా ప్రజలను బెదిరిస్తూ నేరుగా వీడియో కాల్ చేసి ఆధార్ కార్డు, సెల్ ఫోన్ నెంబర్ మిస్ యూజ్ అయ్యాయని బెదిరిస్తారు. కేసు నమోదు అయ్యిందని భయపెడుతారు. డిజిటల్ అరెస్ట్ చేస్తున్నట్లు చెప్తారు. ఈ కేసు నుంచి తప్పించాలంటే డబ్బులు ఇవ్వాలని చెప్పి అందినకాడికి దోచుకుంటున్నారు. తాజాగా ఈ కొత్తరకం మోసాన్ని ఓ నెటిజన్ బట్టబయలు చేశాడు. మొత్తం స్కామ్ జరిగే విధానాన్ని వీడియో షూట్ చేసి సోషల్ మీడియాలో పోస్టు చేశారు. ప్రజలు అప్రమత్తంగా ఉండాలని సూచించాడు.ఇలాంటి స్కాం ల పట్ల అప్రమత్తం గా ఉండాలని సైబర్ క్రైమ్ పోలీసులు సూచిస్తున్నారు.ఈ మధ్య కాలంలో సైబర్ మోసగాళ్లు డిజిటల్ అరెస్ట్ ను పావుగా వాడుకుంటున్నరు. ఇంతకీ డిజిటల్ అరెస్ట్ అంటే ఏంటంటే? సైబర్ నేరస్తులు అమాయకుల ఫోన్ కు వీడియో కాల్ చేసి మీ ఆధార్ నంబర్ లేదంటే సెల్ ఫోన్ నెంబర్ మిస్ యూజ్ అయ్యింది. వాటి ద్వారా పెద్ద మొత్తంలో ఫ్రాడ్ జరిగింది. మిమ్మల్ని అరెస్టు చేస్తున్నామని ఫోన్ లో చెప్పడాన్ని డిజిటల్ అరెస్ట్ అంటారు. గత కొంతకాలంగా ఇలాంటి నేరాలు పెరుగుతున్నాయి. డిజిటల్ అరెస్ట్ పేరుతో అమాయకుల నుంచి పెద్ద మొత్తంలో డబ్బులు కొట్టేస్తున్నారు. ఈ మోసాన్ని విజయ్ పటేల్ అనే వ్యక్తి బట్టబయలు చేశాడు. కొంత మంది సైబర్ మోసగాళ్లు ఆయనకు కాల్ చేశారు. ఓ పార్శిల్ లో మాదక ద్రవ్యాలు ఉన్నాయని, అది మీ పేరు మీదే ఉందని విషయం మొదలు పెట్టారు. ఆ తర్వాత డబ్బులు ఇస్తే ఈ కేసు నుంచి తప్పిస్తాం అనే వరకు వచ్చారు.
సెల్ ఫోన్ కు వీడియో కాల్ చేసే వ్యక్తులు అచ్చం పోలీసుల మాదిరిగానే కనిపిస్తారు. పోలీస్ స్టేషన్ సెటప్ వేసుకుని సైబర్ క్రైమ్ డీసీపీ, ఏసీపీ అంటూ కలరింగ్ ఇస్తారు. వాళ్లు మాట్లాడే మాటలు, చూపించే ఆధారాలు కూడా నిజమేనేమో అనిపిస్తాయి. అందుకే అమాయకులు భయపడి కేసు నుంచి తప్పించాలంటూ అడిగిన మొత్తంలో డబ్బులు ముట్టజెప్పుతారు. తాజాగా అసలు సైబర్ మోసగాళ్లు డిజిటల్ అరెస్ట్ పేరుతో ఎలా బెదిరిస్తారు? అనే విషయాన్ని స్టార్టింగ్ నుంచి ఎండింగ్ వరకు స్టెప్ బై స్టెప్ చూపించాడు విజయ్ పటేల్. డిజిటల్ అరెస్ట్ అనేది ఉండదని, కేవలం కొంత మంది మోసగాళ్లు ఈ పద్దతితో అమాయకులను బెదిరించి డబ్బులు దోచుకుంటున్నారని వెల్లడించాడు. ఇలాంటి కాల్స్ కు భయపడకూడదని సైబర్ క్రైమ్ పోలీసులు తెలిపారు
